மும்பை தொழில் அதிபருடன் காஜல் அகர்வால் காதல்

துபாயில் மும்பை தொழில் அதிபருடன் காஜல் அகர்வால் ஜோடியாக சுற்றிய படங்கள் இன்டர்நெட்டில் வெளியாகி பரபரப்பை ஏற்படுத்தி உள்ளன. 

தமிழ், தெலுங்கில் காஜல் அகர்வால் முன்னணி நடிகையாக உள்ளார். விஜய்யுடன் நடித்த ‘ஜில்லா’ படம் சமீபத்தில் ரிலீசானது. உதயநிதி ஜோடியாக புதுபடத்தில் ஒப்பந்தம் செய்யப்பட்டு பிறகு நீக்கப்பட்டார். அப்படத்தில் காஜல் அகர்வாலுக்கு பதில் நயன்தாரா நடிக்கிறார். 

பாலாஜி மோகன் இயக்கும் படத்துக்கு நாயகியாக தேர்வாகியுள்ளார். தெலுங்கிலும் ஒரு படத்தில் நடித்து வருகிறார். சமீபத்தில் இவரது தங்கையும், நடிகையுமான நிஷா அகர்வாலுக்கு திருமணம் நடந்தது. 

உங்களுக்கு எப்போது திருமணம் என்று கேட்டபோது இரண்டு வருடத்துக்கு பிறகே திருமணம் செய்து கொள்வேன் என்றார். திருமணம் பற்றி சிந்திக்க நேரம் இல்லை என்றும், எனது முழு கவனமும் சினிமாவில்தான் இருக்கிறது என்றும் கூறினார்.

இந்த நிலையில்தான் இளைஞர் ஒருவருடன் காஜல் அகர்வால் நெருக்கமாக இருக்கும் படங்கள் வெளியாகியுள்ளது. அந்த இளைஞர் மும்பையில் பிரபலமாக உள்ள உள் அலங்கார நிறுவனம் ஒன்றில் தலைமை செயல் அதிகாரியாக பணியாற்றுகிறார். 

இருவரும் ஒருவாரத்துக்கு முன் துபாய் சென்றுள்ளனர். அங்கு பல்வேறு இடங்களில் ஜோடியாக சுற்றியுள்ளார்கள். காதலை ரகசியமாக வைத்துக் கொள்ள இங்கே சந்திப்பதை தவிர்த்து வெளிநாடு போய் இருக்கிறார்கள். அங்கு யாரோ ஒருவர் செல்போனில் அவர்களை படம் பிடித்து இன்டர்நெட்டில் பரவவிட்டுள்ளார்.